Baraha bulshada ayaa lagu wadaagay sawir lagu sheegay inuu yahay arooska Cristiano Ronaldo iyo Georgina Rodríguez, taas oo dhalisay hadal heyn weyn. Sawirkan ayaa muujinaya Ronaldo oo xaflad aroos la joogay Georgina, lakiin dad badan ayaa su’aalo ka keenay xaqiiqada arrintan.
Xaqiiqda Sawirka
Sawirka ayaa si weyn u faafay xilli horyaalka Dawri Roshan uu hakad ku jiro sababo la xiriira ka qeybgalka xulka qaranka Sacuudiga ee tartanka Gulf Cup. Si kastaba ha ahaatee, waxaa la ogaaday in sawirka uu yahay mid lagu sameeyay farsamada caqliga macmalka ah (AI), oo aysan jirin cid rasmi ah oo xaqiijisay in aroos dhabta ah uu dhacay.
Ma jiro war rasmi ah oo ka soo baxay Ronaldo, Georgina, ama ilo warbaahineed oo lagu kalsoonaan karo oo xaqiijiyay in arooskan dhacay.
Ronaldo iyo Georgina
Georgina iyo Ronaldo ayaa haatan ku nool Sacuudiga, halkaas oo Ronaldo uu u ciyaaro kooxda Al-Nassr. Xariirka lammaanahan ayaa markii ugu horreysay si rasmi ah loo xaqiijiyay bishii Janaayo 2017, markaas oo Georgina ay la socotay Ronaldo xafladdii abaal-marinta Ballon d’Or, oo uu ku guuleystay xiddiga reer Portugal.
Xigasho: Warbaahinta kala duwan